Halaman:Kaba Si Manjau Ari.pdf/55

Barang tagahnyo kito hantikan
Tuan den si Manjau Ari
Baitu martabat urang baraja
Apo titahnyo kito jujuang
Apo katonyo didangakan
Dangakan sabuah lai

Tinggi maligai rajo Batak
Puti bagerai di halaman
Pacik pitaruah banyak-banyak
Suangguah lamo lupo jangan

Katonyo nan jan dijawab
Apo suruah kito turuik
Apo tagahnya dihantikan
Itulah nan pitaruah den
Pitaruah jangan diubah-ubah."

Bakato si Murai Randin
"Tuan hambo lah hambo sarahkan
Tunjuak ajai di Tuanku
Hambo bapitaruah di Tuanku
Sabarek bumi jo langik
Kok le lakehnyo malin
Antah le malin pado angko
Antahnyo labiah pado angku
Datang pangaja kapadonyo
Angku jan bahati bangih
Kok bangih hati Tuanku
Takanai angku pado Allah
Itulah nan pitaruah hambo."
Dek lamo bakalamoan
Inyo bajalan anyolai

Dek lamo lambek di jalan
Tibolah pulo di masajik
Baiak si Manjau jo gurunyo
Hari basarang patang juo
Dimalam samalam nantun
Ditiliak pado si Manjau