Halaman:Kaba Si Manjau Ari.pdf/59

Tuanku nan tak maaja.
Itu sabab hambo tak mangaji
Di alih indak hambo pandai
Diaso indak hambo tahu

"Manjau kamari ang den aja!"
Balari si Mnajau Ari
Bajawek salam jo Tuanku
Manggigia tangan Tuanku
Ditunjuakkan mangaji Alih
Si Manjau kaji kuraan
Ditunjuakkan kaji kuraan
Inyo lah mangaji saraf.
Ciek kaji nan ditunjuakkan
Ampek limo kitab nan dapek
Diajakan pulo babilang
Ditunjuakkan babilang aso
Inyolah babilang duo.
Ditunjuakkan babilang duo
Inyolah babilang tigo
Ditunjuakkan babilang puluah
Si Manjau babilang ratuih.
Lah habih-habih pandai tuanku
Si Manjau babilang juo
Patang pagi inyo babilang
Siang malam inyo mangaji
Indak minum indak makan
Kok siang indak bajalan
Kok malam indaknyo lalok.
Inyo nan rintang di kajinyo
Minum tidak makanpun tidak
Bak itu adat rang baguru
Makan nan sudah dahulunyo
Minum sudah pulo dahulu
Sajak di rahim bundo kanduang

Alah sabulan duo bulan
Sakitu lamo baguru
Hari Juinahat sahari tu