Kok den bunuah mati-mati
Kok den gantuang tinggi-tinggi.
Manjawab urang nan banyak
"Ampunlah kami guru kami
Indak kami nan badikia
Anak tuanku nan badikia
Nan banamo si Manjau Ari."
Tuanku Mandanga kato itu
Hati nan bangih tak bakasan.
Lah lamo pulo antaronyo
Lah sudah inyo badikia
Bajalan urang sadonyo
Tinggalah guru si Manjau
Inyo nan sadang ateh surau.
Sudah sabulan duo bulan
Hari Jumahat sahari tu
Lah rapek urang sadonyo
Bakato malah tuanku
"Manjau bajalan ang dahulu
Amak maaja-aja langkah
Amak kalua paluah buruak.”
Bajalan si Manjau Ari
Dek lamo bakalamoan
Tibo diukatu sambayang
Bakato malah tuanku"
"Manokah tuan-tuan sadonyo
Dangakan bana kato hambo
Lai amuah bak janyo hambo"
Manjawab urang sadonyo:
"Sukolah kami bih manuruik
Io manuruik kato angku
Kito cilakoilah si Manjau
Sakato kito mangatokan
Kok datang sudi siasek
Kito nan jangan mambanakan
Dek inyo labiah pada hambo
Halaman:Kaba Si Manjau Ari.pdf/63
↓Laman ko alah sah
