Kok buliah pintak bakeh nan banyak
Mak jajok mande bapaknyo
Tajahanam juo si Manjau
Kok tak bajalan nyo disiko
Awak kito lali dihukumnyo."
"Kok baitu nan kato Angku
Sakato kami rang nan banyak
Manuruik kato angku nantun."
Lah bajalan urang nantun
Bakato malah gurunyo
"Nak den uluakanlah ang pulang
Mande bapak ang mamasankan
Kok tibo kito di rumah
Tinggi maligai rajo Batak
Puti bagerai di halaman
Pacik pitaruah banyak-banyak
Sungguah lamo lupo jangan
Kok den suruah maambiak siriah
Pucuaknyo nan ka ang ambiak
Kok den suruah maambiak pinang
Arainyo nan ka ang ambiak
Kok den imbau ang ka rumah
Jan ang naiak ka rumah
Kok batanyo mande jo bapak
Jan ang katokan den manyuruah.
Baitu nan pitaruah den."
Dek malam samalam nantun
Sakalok indak ditiduakan
Duo kali ayam bakukuak
Cukuik katigo hari siang
Inyo bajalan anyolai
Lamolah pulo antaronyo
Lah tibo pulo di halaman
Tuanku naiak ka ateh rumah.
Bakato malah tuanku
"Manjau naiak malah ka rumah!"
35
