Halaman:Kaba Si Manjau Ari.pdf/71

"Manjau usah ang ka surau
Manjau suruiklah ang pulang
Jan lamo-lamo ang di rumah
Usah katuju rasan kampuang
Lakeh ang baliak kamari!"

Manjawab si Manjau Ari:
"Ampunlah hambo pado Angku
Ampun baribu kali ampun
Ampun dibawah tapak kaki
Kok disuruah hambo pai
Kok ditagah hambo bahanti
Sabuah anyo pintak hambo
Hambo ka baliak pulang
Tuanku katingga ateh surau
Bajawek salam kito dahulu."
Anak ka pai guru ka tingga
Bajawek salam jo tuanku
Mangigia tangan tuanku.
"Pacik pitaruah hambo di angku
Simpan umanat baiak-baiak
Elok-elok pangaja angku
Usah dibuek sarupo nangko
Amaklah sadang di hambo surang.
Barek pitaruah pado angku
Sabarek bumi jo langik!"

Bakato pulo si Manjau:
"Angku ka tingga hambo ka pai
Salamat hiduik Tuanku!"
Si Manjau babaliak pulang

Mandaki manggunuang-gunuang
Manurun kapanco-panco.
Managih baunduang-unduang
Lah basah baju di dado.

Dek lamo lambek di jalan
Inyo lah sampai malah pulang
Pintu basaok kasadonyo.

Templat:Left