Halaman:Kaba Si Manjau Ari.pdf/75

Bakato bundo ateh rumah
“Indak kami ka baragiah
Ayam jo itiak kami bari
Anjiang den bari makan
Buliah panunggu halaman den.'

Lah ditingkek malah janjang
Bundo balari ateh rumah
Lah ditariak tabuang didiah
Bajalan pulo ka pintu
Si Manjau tagak di janjang
Dituang jo aia didiah.
Lalu managih si Manjau
Duduak inyo di bawah lumbuang
Aia mato badarai-darai
Dek lamo duduak di sanan
Tagak badiri anyolai
Bakato si Manjau Ari
"Manlolah Bundo kanduang hambo
Barilah sakali nangko
Bago kok karak-karak hanguih
Bago kok dilawak-lawak ayam
Bago kok siso-siso mande."

Bakato mande ateh rumah
"Indak kami ka barangiah
Elok anjiang den bari makan
Buliah panunggu halaman den.

Lah ditingkeknyo pulo janjang
Duo buah janjang ditingkek
Balari pulo ayahnyo
Balari ka biliak dapua
Lah ditariak tungku tangah
Bajalan pulo ka pintu
Si Manjau tagak di janjang
Dihampoknyo pulo diapaknyo
Badarai batu di kapalo
Mandencek inyo ka halaman.
Manangih si Manjau Ari

Templat:Left