Managih ka lasuang gadang
Manangkuik inyo ka bumi
Maningadah inyo ka langik
Inyo bajalan ka halaman
Inyo lah naiak ka rumah.
Lah dilangkahinyo pulo bandua
Balari pulo mamaknyo
Diamuaknyo jo kurambik
Lah putuih siba bajunyo
Inyo mahambua ka halaman
Bakato si Manjau Ari:
"Iko moh balasan manjo
Pandai bana moh bapak den
Kasiah bana moh mande den
Mande den malimaui den
Apak den mangasai den
Mamak den mangguntiang baju.
"Manolah mande kanduang hambo
Kok hukum alun ka mati
Kok gantang alun ka panuah
Kok aja alun ka sampai
Itulah tapuang di bapak den
Kok indak ado-ado nan mandindiang
Badarai batu di kapalo den."
Bakato pulo si Manjau Ari
"Manolah bundo janyo hambo
Kok bundo lah jajok bana
Mak hambo bajalan siko
Basuko barila kito dahulu
Rilakan riban mamaluak
Rilakan badan diri hambo
Mak bajalan hambo siko.”
Manjawab bundo ateh rumah
"Rilalah jariah payah den
Rilalah riban den mamaluak
Rilalah aia susu den
Rila dari dunia ka akirat."
Bakato si Manjau Ari
41
