Lah sabulan duo bulan
Aia mato badarai-darai
Anak rang di Banuhampu
Nak lalu ka Batang Hari
Di dalam rimbo piatu
Litak kamano mintak nasi
Dek lamo bakalamoan
Aia mato badarai-darai
Dihapuih jo tangan kida
Disipekkan paluah jo tangan suok.
Mandaki manggunuang-gunuang
Manurun kapalamunan.
Managih baunduang-unduang
Takana di paruntuangan.
Lah lamo pulo antaronyo
Inyo lah tibo di sinan
Di karambia atua tungku
Di pinang nan linggayuaran
Di batu sandaran rajo
Inyo bahanti anyolai
Duduak maurai aia mato.
Dek lamo duduak disinan
Kok untuang tasipat di nyo
Lalulah rajo di Kinali
Bakato malah rajo nantun:
"Adiak kanduang si Manjau Ari!
Apolahkoh marao-rao
Aia taganang di papuluah.
Apolahkoh mambao-bao
Awak rang sanang diparusuah."
Manjawab si Manjau Ari:
Tinggi babuangan rumah darek
Tampak nan dari Bukik Tinggi.
45
