Isuak nak hambo baleh guno.'
Bakato rajo di Kinali:
"Laia biduak Majo Baiak
Balaia lalu ka subarang
Nak lalu ka Batang Hari.
Asa le untuang adiak ka baiak
Pueh tatungkuik tatilantang
Tacapai juo tanah tapi."
Bakato si Manjau Ari
"Anak rang di Koto Tuo
Nak singgah ka Padang Panjang
Nak lalu ka Batang Hari.
Bari luruih hambo batanyo
Bari kusuih hambo manarang
Kamalah tuan ka pai?"
Bakato rajo di Kinali
"Nan kok itu adiak tanyokan
Nan luruih bana di hambo
Hambo ko pai kasanan
Sanan urang bagalanggang
Galanggang Puti Kasumbo
Galanggang mancari jodo
Hambo handak ka kiun
Ka lalu ka kampuang si Murai Randin
Di sinan kampuang si Murai
Di ranah Payuang Sakaki."
Indah kampung bukan kapalang
Labuah panjang candai tabantang
Labuah pandak siku-basiku
Jiluang batimba jalan
Pudiang ameh paga dilua
Daun silayu baibaran
Pamenan anak suatan-sutan
Pamenan anak rajo-rajo.
47
