Bakato Si Manjau Ari:
"Tuan denai rajo di Kinali
Kok iyo tuan ka kasanan
Jan ditolong lai maluli
Tolonglah manggantiah juo.
Jan ditolong lai jo rugi
Tolong hambo jo jariah juo.
Karano Allah, Tuan hambo
Bao juolah pasan hambo
Mak manang tuan manyabuang
Mak kasiah Bujang Juaro.
Suruah bao pakaian hambo
Suruah bao baju hambo
Suruah bao rencong hambo
Suruah bao padang hambo
Katokanlah di si Murai
Suruah bao ameh perak
Hambo siko manantikan
Di karambia atua tungku
Di pinang nan linggayuaran
Di batu sandaran rajo.
Bakato rajo di Kilani
"Insya Allah jadilah itu."
Bajalan rajo di Kinali
Kudo nan balang samburani
Rajah kaki kaampeknyo
Palanonyo ameh samato
Injah-injah perak bahelo.
Inyo bajalan anyolai
Dilorong pado kudo nantun
Sadang manduo-duo pandak
Marantau panjang anyolai
Ganto babunyi bak talempong
Bagai talempong rajo Jao.
Dek lamo lambek dijalan
Dek lamo basarang hampiang
Lah tibo pulo di sinan
48
