Baitu kato aciak den
Katonyo nan den katokan
Tuan le samo maningaran.
Manjawab rajo di Kinali
"Nan kok kaitu katonyo
Makalum pado diri hambo
Saba jo rila hambo pakai.
Mangko hambo jalang kampuang nangko
Mangko hambo tampuah halamannyo
Bareklah pasan hambo bao
Barek pitaruah hambo pacik
Antah si Manjau antah bukan
Inyo bapasan bakeh hambo
Manyuruah mambao rencongnyo
Si Murai nan ka mambao
Kain baju nan ka dibao
Heranlah hambo malieknyo
Managih juo inyo kini
Minun tidak makanpun tidak.
Datang hujan kahujanan
Di sinan inyo manantikan
Di karambia atua tungku
Di pinang nan linggayuaran
Di batu sanda an rajo."
Urang mudo si Murai Randin
Mandanga kato nan bakkian
Baru tasabuik dunsanaknyo
Baru takato Manjau Ari
Mambubuang nyao nan sati
Tasimbua darah di dado
Gumanta tulang jo dagiang
Batangkuik bumi jo langik
Managih si Murai Randin
Baru tasabuik si Manjau Ari
Tanun tarantang lah takusuik.
Inyopun tagak anyolai
Tagerai rambuik nan panjang
Tatabua bungo dalam sanggua
50
