16
Dimano djawi nan kakenjang
bagubalo dipagi hari
Dimano hati indak kasanang
lah dapek kakancak hati
Anak urang Batusangka
hari Rabaa pai kapakan.
Kandak bulieh, pintak balaku
bara kasanang raso badan.
Kok tuan pai ke Kurintji
singgah lalu ka Painan
Kok mati sadang bak kini
indak rilah angok badjalan.
Gadanglah hati Sutan Karunia baitu pulo Siti Mariam duduak baduo tasak keduo nan labieh bana Sutan Karunia hati gadang indak tabado dapek bini bak tjando bulan dipatuik pulo badan diri sasuai balun djo djuntoi kok makan indak namuah surang makan baduo kandak hati sasuai bana rueh djo buku samo sapohon kaduonjo iri hati urang malihek satapak indak amuah batjarai pai surang, pai keduonjo bak tjando aua djo tabiang raso kan mati badan batjarai dek lamak rajuan Siti Mariam sarik batamu djo Sutan Karunia labieh-labieh bapak mandehnjo kok nak basuo djo Sutan Karunia karumahnjo mangko basuo lah sarik njo badjalan surang. mantun pulo Siti Mariam ka- pasa indak amuah surang kok indak baduo-duo bia makan indak basamba kok pai sajo kapakan baduo djo Sutan Karunia badjalan bagandieng-gandieng hati gadang pikiran sanang galo mato mamandangi laki-bini eh nan mudo-mudo banjak urang nan babisi tapi indak sanggo tu bana salah mantjatji-i laku parangainjo sarupa kato dangan njonja banjaklah urang mampaketjekkan ramai urang bagundjieng dek ulah laku Sutan Karunia.
