22
Siapo garan namo adiak apo mukasuik kaditjari mandjawablah padja nantun namo hambo si Nurijah urang Agam di Bukittinggi mukasuik hati nan kamari kok lai urang manaruah hibo maambiak hambo bakaradjo untuak mamipih mipih lado manasah kain nan kumuah batanak manggulai pun djadi apo disuruah amuah manuruik asa lai dapek makan hambo nan tidak baibu bapak anak jatim piatu tidak ado tampaik manompang baru tibo dari Bukittinggi tak ado urang didapek-i bari manompang malah hambo bia hambo lalok didapua.
Mandanga kato bahibo hibo sirah mato guru Amia balinang aia matonjo guru Amia urang pahibo takana adiak si Salamah raut muko saroman bana bakato Sutan Amirudin kalau baitu kato adiak bamalam malah adiak disiko lai pandai adiak batanak atau manggulai manjamba katonjo guru Amia mandjawab si Nurijah insja Allah lai tahu samba nan murah murah bakato si Amirudin ruponja akau kadinganan tukalah badju djo nan lain.
Kan io Siti Zahari diambiak badju kabilik badju Zahari nan usang usang kodek djo badju dibarikan lakek pakaian nan batuka baru taraso angek badan galak tasanjum kasukoan maliek galak Nurijah batambah hibo guru Amia.
Kan io si Nurijah diliek hari sandjo rajo tapasang lampu tangah rumah diandjua turun kadapua dibaiah kaju kapatanak dadjarang tungku duo tigo ditanak nasi talua bakuah lah masak samba patai goreng patai matjo bada masak pulo dendeng balado masaknjo sangaik barasiah anak sigap pai kadapua lah sudah masak nasi disapu rumah anjo lai dikambangkan lapiak pandan putiah djamba taedang tangah rumah tjukuik djo kopi bagulo lah sudah edangan talatak makanlah guru Amirudin makan pulo si Zahari.
Kan io guru Amirudin sangaik lamak makan injo bapaluah kaniang kaimakan samba lado djo gulai paku sarato djo goreng patai patai bagoreng matjo
