29
tangan putiah lunak lambuik maliek pakaian Nurijah indak kalah djo anak damang tidak ado urang nan tahu anak samang guru Amia urang manjangko adiak kanduang bantuak muko hampia sarupo salamo duduak diateh kureta suduik mato ke Nurijah takilik iman Amirudin kapado gadih Nurijah tapi sungguah nan bak kian ditaruah sadjo dalam hati.
Luruih djalan ka Tjubadak
Basimpang djalan di Tjagan
Kakida Batang Palupuah
Bak api mamakan dadak
Dilua indak mangasan
Didalam hantjua luluah
Gadang aia Sungai Sirah
Tarandam batang pilin pilin
Maliek rupo si Nurijah
Takilik iman Amirudin
Kan io si Nurijah duduak baduo djo si Amia kawan sikolah maso dahulu laksana parasaian disikolah bunji galak badarai darai samo maurah parasaian kadang kadang bahaso Balando sangaik pandai kaduonjo lapeh sikolah kalas ampek io sikolah guru bawah kok tidak mati mandenjo mungkin injo djadi guru dek laku mande tirih tabuang buruak si Nurijah tapi sungguah nan bak kian namun intan batjajo djuo bia tatjampak ditjirik kabau namun tjahajo bakilek djuo.
Kalau nak tahu diudjuang pandan
Sapantun batang talutuak
Dek untuang mularaik badan
Ameh disangko lojang buruak
Lorong kapado guru Amia tatjangang sadjo mandangakan pandai Nurijah bahaso Balando ba-kato2 dalam hati mungkin injo urang baiak tibo kureta di Padang turun injo di Pulau Aia injo tingga di
