36
marandahkan badan bakato djo galak sanjum maliek galak si Nurijah hantjua hati ramuak didalam lah kaduo injo babini baru kini marindu dandam lah sudah utang dibajia badjalan injo kadalam toko sanan bakato guru Amia piliah diadiak nan katudju buliah dibali hambo bajia.
Kan io gadih Nurijah diliek kain duo buah kain batiak Pakalongan sarato kain kabadju dipiliah ragi duo buah disanan rantjak disiko katudju ragu Nurijah mamandangi lah sudah kain balipek dibungkuih urang toko harago dibajia diguru Amia.
Lorong kapado si Nurijah sanang hati maso itu apo kahandak lai babari badjalan pulang kaduonjo samo dimabuak kasiah sajang ado sabanta antaronjo lah tibo dihalaman naiak karumah keduonjo.
Bakato guru Amirudin kapado Siti Nurijah dalam aia balun dadiuak dalam hati sia nan tahu mano kau adiak Siti Nurijah dangakan malah den katokan.
Lorong kapado adiak kanduang dangakan malah pantun urang.
Sadjak batjino di Piaman
Banjak Ulando makan babi
Sadjak babungo dihalaman
Banjak kumbang mahampiri
Lapeh nagari Pagu-pagu
Handak mandjalang Pandai Sikek
Hambo manaruah Nuri mau
Banjak urang nan mamikek
Kato pantunjo guru Amia mandanga pantun nan bak kian sudah maalum dalam hati kilek baliuang lah kakaki kilek tjamin kamuko mandjawab Siti Nurijah mandjawab sadang bapantun.
Anak ikan dimakan ikan
Anak iju dalam lauik
Sanak bukan sudaro bukan
Dek budi basangkuik pauik
