Mandanga kato Tuanku Lareh mandjawab Angku Kapalo,
Tumbuah birah dihalaman
Tumbuah sarumpun djo kaladi
Sudah buatan djo sukatan
Indak buliah batangguah lai
Katonjo Angku Kapalo mandjawab Tuanku Lareh manolah Datuak Angku Kapalo kito tjari lantai tadjungkek kito buek titian nan barakuak supajo injo tak djadi kawin ditjari aka djo tipu kok tidak marasai Lembak Tuah bukan den mandjadi Tuanku Lareh ado sabanta antaronjo dapek pikiran maso itu mantjilakokan Lembak Tuah dituduah maliang dalam rumah ijo dirumah Hadji Amat kahilangan pakan dahulu ditjari sudi djo siasek sampai kini balum basuo tidak ado tando djo beti hilang sahilang sadjo bakato Tuanku Lareh.
Manolah Datuak Angku Kapalo baa pikiran pandapek Datuak kahilangan dirumah Hadji Amat kok ditadiang alah tarateh umpang-umpang alah takanak taranglah injo kamalingan salapan hari sampai kini tidak ado usua pareso kaba tidak barito tidak malu kito di Tuanku Mandua dapek buruak kasudahannjo alah duo putjuak surek datang manjuruah tjari sipamaliang. Mandjawab Angku Kapalo manolah Tuanku Lareh lorong kapado nan mamaliang hilang aka badan denai lah banjak sudi djo siasek kapado urang nan runtjiang tanduak didiapuik paso samo sakali surangpun tidak tando djo beti katonjo Angku Kapalo. Mandjawab Tuanku Lareh kok itu Angku katokan dimano rang maliang namuah mangaku salah bana itu datuak manolah Datuak Angku Kapalo saruah djapuik Sutan Lembak Tuah anak dek mande Saadiah itu dipuruak didjahanamkan buliah dibuek asuang pitanah ditjari sasi duo orang dibuek tando beti diupah urang djadi sasi mandanga kato nao bak kian galak tabahak Angku Kapalo sudah maalum dalam hati kilek tjamin alah kamuko kilek baliung alah kakaki
18
