Birauari Sutan Lembak Tuah dibulekkan pikiran maso itu sudah takadia garak Allah sudah suratan di rahim bundo asa sabuik nak tarapung asa batu bia tabanam kapa balajia anjo lai batulak dari tanah Padang kapa maharuang lauik lapeh mambao untuang Lembak Tuah indak guno diparusuah disarahkan badan ka nan satu buruak baiak ditangan Allah
Kan ijo Lembak Tuah dibao urang kadalam tangsi tangsi kurungan urang rantai dalam nagari kota Betawi dalam daerah tanah Djawa lorong kapado tuan Sapia maliek tingkah laku Lembak Tuah tidak sarupo urang nan banjak tingkah parangai sangaik rantjak tahu diuntuang nasib badan pandai babaua djo kawannjo indak ado mandapek salah sajang hati tuan Sapia dibari karadjo nan ringan-ringan disuruah tingga dirumah Sapia disanan tingga siang malam pandai manulih djo mambatjo tulisan rantjak djaleh dibatjo sanan Sapia batambah sajang dek lambek lamo dalam tangsi hampia katjukuik duo tahun si Sapia kapalo dalam tangsi disuruah tjando Lembak Tuah maanta surek suruhan Sapia alah sudah surek dikarang sanan bakato tuan Sapia mano hang Sutan Lembak Tuah antakan surek ka tangsi baru kapado Sapia nan disanan dek rang mudo Lembak Tuah diambiak surek nan balipek surek dikirim tuan Sapia badjalan bagageh-gageh.
Alah sarantang padjalanan tjukuik kaduo rantang pandjang maliek djuo kiri kanan urang nah rami di djalan rajo banjak basilang motor kareta hiruak pikuak ditangah djalan bunji bendi badarun-darun bunji kareta badasiah-dasiah indak tabado banjak urang indak tantu Tjino djo Kaliang tatjangang tjando Lembak Tuah maliek urang sangaik banjak toko baririk suok kida sadang maliek tatjangang-tjangang tampaklah bendi balari kantjang kudo takadjuik maso itu balari bak alang tabang kusia didalam tidak ado tibo dibendi bendi ramuak tibo diurang urang mati kudo manduo baleri kantjang surangpun tidak dapek manolong hilanglah aka urang nan banjak tjameh pikiran
22
