Badantuang mariam tigo putjuak alamaik Tuanku Damang alah tibo disonsong dengan anak gadih-gadih mambao siriah ditjarano batutuik dengan suto kuniang batatah dengan banang ameh.
Lah turun Sutan Lembak Tuah badjawek salam dengan pangulu sarato dengan Angku Kapalo diiriang masuak kadalam kantua alah duduak sagalo Angku Kapalo sarato pangulu basa batuah tjukuik djo imam dengan katik tjadiak pandai indak tingga urang banamo ampek djinih.
Sanan bakato Tuanku Mandua
mano sagalo niniak mamak sarato alim djo ulama tiukuik djo urang tjadiak pandai dihari sahari nangko sakali aia gadang sakali tapian baraliah baitu adaik sadjak dahulu karano Lareh sudah baranti dituka dengan Tuanku Damang pusek djalo pumpunan ikan mamalihato nagari dengan kampuang kok salah tampek mahukum tampek batanjo salah bana katonjo Tuanku Mandua.
Lorong kapado kato tuan djikok satitiak kami lauikkan sakapa kami gunuangkan.
Manjawab Datuak Gunuang Hidjau ampunlah kami Tuan Kumandua dipatjik dikabek arek kalau malam dipasukuang kalau siang kami patungkek kato sambah Angku Kapalo Angku Kapalo Gunuang Hidjau.
Bakato Sutan Lembak Tuah mano sagalo ninik mamak tjukuik djo alim djo ulama sarato dengan tjadiak pandai sungguahpun hambo djadi Damang mamarintah kampuang nan sabaleh karano hambo mudo malah aka kurang pikiran singkek kalau salah tolong tundjuki kalau tadorong tolong pintehi ijo djuo bak kato nan tuo mandjadi mamang di nan pandai ganti pakaian dinan mudo elok nagari dipangulu elok tapian dinan mudo elok rumah diinjiak mamak asa kito samo saijo nan barek mandjadi ringan nan djauah mandjadi hampia elok kato djo mupakaik,
29
