Manolah mande kanduang denai batapo garan siti Rabiatun sudah balaki djo urang lain atokoh ado hiduik kini katonjo Sutan Lembak Tuah. Mandanga kato nan bak kian bakato mande Lembak Tuah lorong kapado Rabiatun anak nan sangaik kareh hati lah banjak urang maminangnjo injo nan tidak namuah balaki dek takuik djo Tuanku Lareh larilah injo ka tanah Padang kaba tjurito kato urang kini mandjadi guru sikolah mandanga kato mande kanduang tasanjum sadjo Lembak Tuah
Kan ijo Sutan Lembak Tuah sadjak batjarai djo Rabiatun hati nan tidak sanang lai raso dimato Rabiatun.
Gunuang Padang badjandjang batu
Silasiah badahan tidak
Kasiah tadorong sadjak dahulu
Sampai kini lupo pun tidak
Kan ijo Sutan Lembak Tuah ditjari katiko nan lai lapang mukasuik manindjau Rabiatun badan lah lamo indak basuo antah barubah garan kini nak tantu lai tidaknjo dek Sutan Lembak Tuah bakato kapado mande kanduang kok baitu kato mande elok lah hambo pai ka Padang maliek tjando Rabiatun bari izin hambo badjalan. Kan ijo Sutan Lembak Tuah badjalan turun kahalaman badjalan bagageh gageh dek lamo lambek didjalan alah tibo di Bukuttinggi di liek tjando ka Tasiun tampak kareta nan ka Padang bagageh masuak kadalam daresi dek elok langkah Lembak Tuah barangkek kareta anjo lai kareta api pukua salapan. Lorong kapado Lembak Tuah bamanuang manuang duduak surang pikiran raso raso ka sampai ditjari aka tidak mangasan kalau mambuhua usah mambuku kalau mauleh usah mangasan pandai mambungkuih tidak babaun
Kan ijo Sutan Lembak Tuah bakato dalam hati mantjari aka djo pikiran hati nan harok harok tjameh tjameh raso tidak basuo harok nan raso kamandapek
31
