Tidak barapo antaronjo sampai kureta di tasiun Padang turunlah Sutan Lembak Tuah dipakai badju sagalo buruak badju batamba tjumpang tjampiang di kabek kaki nan disuok badjalan batungkek rantiang sarupo urang sakik puru.
Kan ijo Sutan Lembak Tuah urang biaso lamo di Padang tantu sadjo dijalan dijo liku diliek hari pukua satu tando sakolah alah kalua sanan dek Sutan Lembak Tuah diliek urang nan lalu disimpang ampek Alang Laweh dek untuang takadia Allah lah tampak tjando Rabiatun duduak diateh kureta angin tidak salah mato mamandangi digubik tjando Rabiatun dihimbau djo suaro kareh takadjuik siti Rabiatun diliek tjando didaketi diliek dipandang-pandang bana bakato siti Rabiatun.
Tuan den Sutan Lembak Tuah pabilo tuan datang kamari lah lamo kito indak basuo katonjo guru Rabaatun bakato sadang manangih aia mato bak maniak putuih maliek untuang Lembak Tuah sarupo urang mintak sadakah
- Ramilah pakan pasa Rabaa
- Rami dek urang Panjalajan
- Sadjak tabuang katanah Djawa
- Ikolah djinih parasaian
- Anak tjino babadju sitin
- Sudah sitin sukalaik pulo
- Badan hino lagi miskin
- Sudak miskin mularaik pulo
Katonjo Sutan Lembak Tuah bakato bahibo hibo diliek sadjo djo suduik mato ruponjo kasiah tidak barubah
Mandjawab guru Rabiatun.
- Bakelok djalan ka Palupuah
- Bakelok lalu djalan ka Tanang
- Usaah hati diparusuah
- Salamo marasai kok lai sanang
32
