PUTI AMEH MANAH dengan PUTI KASUMBO DIKUBUAKAN HIDUIK HIDUIK.
Aliahnjo kapado Puti Kasumbo duo djo Puti Ameh nan didalam rumah nan gadang ajia mato balun lai kariang kiro sapakan antaronjo adolah pado suatu malam patang Kamih malam Djuma'at sadang dek Puti Ameh Manah kiro2 pukua duo baleh tangah malam alah sakit rasonjo badan sakit bak raso ka baranak dek untuang Takdir Allah Tuhan Allah kajo sungguah alah lahia malah anaknjo salorong tantangan padja nantun tibo dilantai lantai patah tibo dirasuak rasuak taban sadang dek Puti Kasumbo diambiak malah adiak kanduang ditjaliak adiak kironjo laki2 lalu dibao katangah rumah sanan dikarek malah puseknjo.
Bakato Puti Kasumbo: „O mandeh kanduang hambo alah untuang bana malah dikito bapak mati adiak pun lahia kini baitu malah dek mandeh adiak den ka den namoi manuruik kadjadiannjo denai surang manamokan den bari namo si Untuang sudah alah sudah untuang dek kito bapak mati injopun lahia", lalu dipaluak malah adiak sanan bakato Puti Kasumbo: „Adiak kanduang lakehlah gadang kok sampai badan adiak gadang bangkitkan djuo tareh tabanam pandjapuik gadai nan lamo pamupuih malu dikaniang lakehlah djuo adiak gadang", lalu dibuaikan dalam buaian.
Dialiah kaba hanjo lai ijo kapado Radjo Hangek Garang duo djo Pandeka Sutan injo mandapek kaba bu
8
