malengah sarupo urang tidak atjuah sanan bakato si Kambang Manih: „Kok iko ruponjo urang nantun ka pandia malah atjiak kanduang",
Mandanga kato damikian manangih si Untuang Sudah taraso malu dalam hati ramuak rasonjo paratian arang tatjoreng pado kaniang tapi ba apolah mangatokannjo awak lah njato urang tabuwang lalu bakato si Untuang Sudah: „Atjiak den Puti Raniak Djintan sadjak dahulu alah den katokan atjiak nan tidak patjajo djuo balun lai sampai hambo kadalam kampuang disiko batu lah kanai upek kununlah kok sampai hambo kakampuang atjiak tidak tatangguang doh tjatji urang tantu balabiah dari iko. Kini baitu malah dek atjiak tingga malah atjiak disiko nak hambo pai badjalan baliak”, bakato injo sambia manangih ajia mato ba darai2 takana untuang buruak awak.
Kununlah Puti Raniak Djintan mandanga dikato si Untuang Sudah sanan manangih injo maso itu lalu bakato djo hibo hati: ,,Adiak kanduang dangakan malah si Kambang usah dihiraukan si Kambang nantun sabangso budak bisa den djuwa den gadaikan injo kan urang suruhan hambo kini baitu malah dek adiak kok tidak kakak nan bakato usah adiak badjalan sadjo usah adiak baketek hati".
Alah bangih si Raniak Djintan ijo kapado si Kambang Manih: „Manolah kau si Kambang Manih usahlah banjak2 kato usahlah lantjang2 muluik usah ta dorong2 sadjo didalam nan buruak ado nan' elok didalam
nan elok ado tjatjeknjo kamudian kok manjasa kini baitu malah dek kau bawolah mundam djo limau kito mandikan anak rang nangko.
36
