Mandjawab angku Radjo Mudo: „Manolah Manti djolong pandai bukanlah ado nan bak kian ato hanjo ado sabuah tantangan anak hambo Puti Raniak Djintan injo nan mamintak dikawinkan dengan si Untuang Sudah laikoh suko urang nagari". Bakato Pangulu dalam kampuang sarato djo Niniak Mamak dalam nagari: „Djiko baitu titah Tuanku kami lah suko manarimo kami djundjuang bagai gumalo kami tanai bak kulindan alah patuik injo badjundjungan sabab alah banjak urang nan maminang injo nan tidak suko djuo usahlah ditulak kahandak injo”.
Sanan manjambah si Untuang Sudah : „Ampunlah hambo bapak kanduang sarato djo mandeh badan diri ampunlah Niniak dengan Mamak sarato Pangulu djo Handiko aluran kakak dengan adiak sarato sagalo urang nan hadok hadang kini nangko kalau lai ka elok rasonjo hambo lah suko pulo manarimo”. Mandjawab Basa djo Pangulu: „Adiak kanduang si Untuang Sudah salorong kami nan banjak iko kami lah suko kasadonjo”. Bakato sanan angku Radjo Mudo: „Kini baitu malah dek kito karadjo baiak elok disugirokan pado ditimpo dinan buruak kito baralek malah lai”.
Mandanga kato nan bak kian uring basiap hanjo lai satangah mambantai kabau satangah mambuwek tungku satangah mantjari kaju adolah duo tigo hari hasillah kasadonjo maso itu halek bamulai hanjo lai patang Kamih malam Djuma‘at alah datang Qadhi dengan
64
