Lah dapek bulek nan sagolek, picak nan
salayang, di tantangan gayuang nan ka
manyambuik, kato nan kamanjawek, ta tumpah
juo bakeh badan diri ambo.
Jokok diambo tu kini gayuang ka disambuik,
kato ka dijawek, tapi sabalun gayuang ka
disambuik, kato ka dijawek, nan marusueh nan
maibo dhati ambo, jokok bak di ate andaknyo
kun iyo tu, sabanyak gayuang sabanyak
sambuik, sabanyak kato sabanyak jawek.
Baa tunyo kini kok indak ta ulang bak
manyapuah, kok indak tabaliek bak mamanggang
ka baa kolah ?
Iko dipulangkan ka bakeh Angku Datuak
(Sutan).
Si Pangka : Yo lah sampai dek Angko Datuak (Sutan) ?
Si Alek : Bilang alah!
Si Pangka : Ruponyo nan manjadi buah panitahan dek Angku
Datuak (Sutan) mahadok ka ateh badan diri
ambo, iyo malah jokok bak di ateh andaknyo di
ukuran nan sampai, di bilangan nan cukuik iyo
malah sabanyak gayuang sabanyak sambuiknyo,
sabanyak kato sabanyak jaweknyo.
Baa tunyo kini kok indak taulang bak
manyapuah, kok indak tabaliek bak mamanggang,
ka baa kolah,
Kan baitu kato Angku Datuak (Sutan) ?
Halaman:Lembaran Adat Minangkabau.pdf/40
↓Laman ko alah sah
