kampuang nantun, di ranah Sandiangbaka, inyo hinggok di lurah dalam, alah tajalani lurah nantun, dicari Magek Manandin.
Lamo sabanta antaronyo, alah tampak Magek Manandin, basanda di batang kayu, bakato si Buruang Nuri, “Tuan ambo Magek Manandin, alah koh sehat badan Tuan?”
Manjawab Magek Manandin, “Adiak kanduang si Buruang Nuri, kok itu adiak tanyokan, badan ambo lah hampia sehat, mintak salamaik umua panjang.”
Lamo lambek di dalam lurah, habih hari baganti pakan, habih pakan baganti bulan, siang basilinduang paneh, malam basalimuik ambun, adang-adang makan adang-adang tidak, adang-adang mandapek makan, si Buruang Nuri mancarikan.
Tigo tahun lamo di lurah, manau batambah gadang juo, manjulai pucuak ka bawah, hampia sampai ka lurah dalam.
Bakato si Buruang Nuri, “Tuan ambo Magek Manandin, pintakkan doa pado Allah, tapasah juo handaknyo ka nagari.”
Pintak nan sadang ka balaku, manau batambah gadang juo.
“Kok sampai panjang manau nantun, buliah tampek Tuan mandaki, jalan nan lain tidak ado.”
Dek lamo kalamoan, alah sampai manau ka bawah.
Talateh talang baduri
Tasanda di baliak lumbuang;
Tangah malam baibo hati
Alah takana mandeh kanduang.
Balayia biduak salido
Batambang tidak bakamudi
Biduak nan hilia ka taram;
Jikok salorong badan ambo
Hilang nan tidak ka bacari
Luluih nan tidak ka basilam.
92
