Langik runtuah matohari padam.
Ayam kuriak si Lenggo Janang
Mambaok taji sabarumbuang
Ulando pulang ka Batawi;
Adiak lah dapek ka nan sayang
Kayu gadang tampek balinduang
Urang nan rajo di nagari.
Mandaki kampuang Arikam
Manurun mangko mandata;
Untuang ambo sakik mancangkam
Bandaharo juo nan kaka.”
Kaba baraliah hanyo lai, aliahnyo kapado Subang Bagelang, alah lamo galanggang rami, inyo nan balun namuah kawin, dari sahari ka sabulan, badan batambah kuruih juo, makan tidak minumpun tidak, badan lah kuruih bagai pimpiang, tidua bagaluang di kulambu, tidak nan lain pangananyo, tuan kanduang takana juo, nan banamo Magek Manandin, antah pabilo ka batamu, batunangan kain pandukuang.
Antah hiduik antah nyo mati, rimbo di mano nan lah busuak, lurah di mano nan lah kanyang, manangih laruik tangah malam.
Tatagak gaduang di Panyabuangan
Gaduang Rasidin Ayia Bangih;
Kalau takana di tunangan
Ambiak banta lalu manangih.
Balirik pinang di halaman
Balai-balai bapaga ganjo;
Walau dirintang jo panjahitan
Tunangan takana juo.
Kaba baraliah hanyo lai, sungguah baraliah sanan juo, aliahnyo kapado Magek Manandin, sadang di dalam lurah juo. Dek untuang takadia Allah, pintak nan sadang ka balaku, alah sampai manau ka
96
