bawah, bakato si Buruang Nuri, “Tuan ambo Magek Manandin, kito bajalan hanyo lai, mandaki Tuan di manau, sarahkan untuang pado Allah.”
Sadang dek Magek Manandin, alah mandaki inyo di manau, tangan suok mamacik manau, diansua juo mandaki, tangan kida lah mangulipak.
Tigo hari lamo mandaki, tabiang tarah sajo ka bawah, tagamang Magek Manandin, alah tibo di tangah, ka ateh kabuik ka bawah kalam, tangan kanan mamacik juo, hampia ka tibo hanyo lai.
Alah tibo inyo di ateh, Buruang Nuri tibo dahulu, bakato si Buruang Nuri, “Oi Tuan Magek Manandin, baranti kito dahulu, raso ka payah bana Tuan.”
Alah barati Magek Manandin, lamo sabanta antaronyo, alah bajalan Magek Manandin, manurun cando ka bawah, dek lamo lambek bajalan, alah tibo di titian panjang.
Bakato Magek Manandin, “Adiak kanduang si Buruang Nuri, adiak bajalan malah pulang, ka Subarang Ayia Gilo, ka rumah Puti Taruih Mato, kabakan ambo lai sehat, pintakkan doa salamaik pado Allah.”
Lamo sabanta antaronyo, alah tabang si Buruang Nuri, tabang manyisia-nyisia awan, tigo hari lamonyo tabang, alah tibo di kampuang nantun, di rumah Puti Taruih Mato, inyo hinggok di ateh anjuang.
Bakato Puti Taruih Mato, “Adiak kanduang si Buruang Nuri, lamo bana adiak bajalan, lai batamu nan dicari.”
Manjawab si Buruang Nuri, “Aciak den Puti Taruih Mato, kalau itu aciak tanyokan, lai batolong pado Allah, lai dapek nan ambo cari.
98
