Manjawab Magek Manandin, "Sungguh baitu kato Tuan, barilah juo tanyo ambo, salorong Magek Manandin, salamo inyo dibuangkan, lai hiduik juo bapak mandeh nyo, baitu pulo adiaknyo Surang?"
Manjawab Bagindo Leman, "Jikok itu Sutan tanyokan tidak guno bana disabuik, banyak bana baibo hati, salorong bapak jo mandehnyo, sampai mularaik kaduonyo, si bungsu alah hampia gilo, tunangan si Magek lah hampia kawin."
Menjawab Magek Manandin, "Kalau itu kato Tuan, kito bacarai hanyo lai."
Alah dijawek malah salam, bajalan Magek Manandin, dihiliakan labuah nan panjang, hampia ka tibo hanyo lai, alah tibo di ladang urang, ladang lamo indak bahuni, diambiak siriah disinan, diam biak siriah banyak-banyak, kan dijua ka galanggang, iyo ka galanggang Subang Bagelang.
Siriah dikabek hanyo lai, alah sudah siriah dikabek, diambiak kulik pisang busuak, alah dikabek pulo kaki, sarupo urang sakik biriang, rupo ditukak jo ditekong.
Alah dijunjuang malah siriah, badan busuak tidak tatangguang, bajalan Magek Manandin, bajalan tatengkak-tengkak, hampia ka tibo hanyo lai, di ranah Sandiangbaka, di laman rumah mandeh kanduang.
Alah tibo inyo di laman, babunyi buni-bunian, mandariang salindik jantan, mancareceh tupai janjang, malanguah jawi bapauik, kudo balang mamutuih tali, takajuik dayang-dayang banyak, hiru biru cando tangah rumah.
Bakato Puti Linduang Bulan, "Anak kanduang Puti Nan Bungsu, samulo tuan kau hilang, balun ado sarupo iko, apolah sabab karanonyo?"
104
