Alah tagak Puti Nan Bungsu, inyo mancaliak ka laman, alah tampak malah urang buruak, urang sadang manjunjuang siriah, bakato Puti Nan Bungsu, "Oi Tuan urang manggaleh, Tuan naiak malah ka rumah, ambo handak mambali siriah, ibo bana ambo di Tuan, tacinto ambo di nan hilang, tuan ambo Magek Manandin, antah hiduik antahnyo mati, tidak batantu tampek diam, lurah di mano nan lah busuak, antah bakajang langau hijau."
Alah lamo kecek mangecek, nasilah masak dek si Kambang, alah dibaok nasi ka lua, bakato Puti Nan Bungsu, "Tuan makanlah dahulu, kok ka pai Tuan ka balai, sanang hati ambo malapeh."
Alah makan Magek Manandin, makan sasuok duo suok, cukuik katigo inyo lah kanyang, malompek kuciang balang tigo, bapaluak inyo ka si Magek, marantak kudo balang kandi, mamutuihtali bilang- bilang.
Maliek nan bak kian, takajuik Puti Linduang Bulan, balun pernah nan bak nangko, apolah garantakwianyo, kok lah mati Magek Manandin, tampan tidak batamu lai.
Sadang dek Magek Manandin, alah sudah makan dangan minum, kato mandeh tadanga juo, adiak kanduang baibo hati, dirintang sajo jo galak, badan nan tidak dibanakan, sabab mukasuik balun sampai, dimintak izin ka bajalan, "Mandeh tinggalah malah dahulu, ambo ka pai ka balai."
Alah turun cando ka laman, alah tibo ditangah laman, bajalan Magek Manandin, siriah dijunjuang hanyo lai. Alah sarantang pajalanan, manuruik kuciang balang tigo, mamutuih tali ayam biriang, kudo balang lah lapeh pulo, manangih Puti Nan Bungsu.
"Oi Tuan urang manggaleh, babaliak pulang malah dahulu, salamo tuan ambo hilang, balun pernah nan bak nangko."
Alah babaliak Magek Manandin, diantakan kudo ka kandangnyo,alah dikabek ayam biriang, kuciang dikuruang hanyo lai.
106
