Manjawab Magek Manandin, "Jikok itu puti katokan, ambo kan urang baru datang, dusun nagari tidak tantu, sabab dibaok untuang buruak, alah taragak ambo nak mandi, itu sabab datang ka mari.
Mandi nan sakali nangko, mamintak ambo sungguah-sungguah, janlah puti ketek hati, jan adiak salah tarimo, kok untuang laimambaleh guno."
Mandanga kato nan bak kian, tamanuang Subang Bagelang, mandanga jawab urang manggaleh, kato sarupo basindiran, "Adiak kanduang puti nan datang, bari luruih ambo batanyo, jan adiak salah tarimo, apo namonyo kampuang nangko, siapo galanya rajo disiko, sabagai pulo kato ambo, dahulu ambo mandapek kaba, maso lai diam di nagari, nan bagala Rajo Kuaso, inyo disabuik urang bana, urang kayo di Sandiang baka, ado surang kamanakannyo, nan geneng di Sandiangbaka, iyo banamo Magek Manandin.
Inyo disabuik urang bana, juaro di tangah balai, pamenan mato urang kampuang, sabab ambotanyokan bana, ambonan baniat nak batamu, kalau buliah bali jo pintak, tolonglah adiak baritahu, di mano bana kampuangnyo?"
Baru mandanga kato nantun, manangih Subang Bagelang, "Oi tuan urang manggaleh, usah disabuik duo kali, ula lalok tuan jagokan, hatiambo bakao sanang, alah kusuik pulo babaliak.
Jikok itu Tuan tanyokan, nak ambo katokan bana, nan banamo Magek Manandin, itulah tunangan ambo, batunangan kain pandukuang, kini dimano inyo lai, alah dibuang di bapak ambo, alah bakajang di lurah dalam."
Manjawab Magek Manandin, "Adiak kanduang puti nan datang, sabuah ambo katokan, kok lai juo hanyo si Magek, kok hiduik juo inyo kini, laika suko hati adiak, manarimo urang tabuang dek mamaknyo?"
112
