Manangih Subang Bagelang, dijawab dangan hati ibo, “Jikok itu Tuan tanyokan, kok lai hiduik inyo kini, bialah bangih bapak kanduang, bialah banci niniak mamak, iyo bak undang urang tuo,
Pipik parik tabang ka parik
Tibo di parik kanai gatah
Tumbuah sipuluik badaun mudo;
Tatungkuik bumi jo langik
Balenggang nagari Makah
Tuan kanduang dinanti juo.”
Manjawab Magek Manandin, “Kalau baitu kato adiak, nak ambo katokan bana, salorong Magek Manandin, inyo nan lai hiduik juo, lai ambo mambaok pasan, bapasan buni dalam bapantun,
Barambuih angin dari Salatan
Angin banamo Silangsari;
Jikok pulang baoklah pamenan
Banakan untuang badan kami.
Kurai Taji kampuang jilatang
Rumpuik dimakan ka tumbuah lai;
Sansai badan dirunduang malang
Kampuang tidak tajalang lai.
Banyak pasannyo bakeh ambo, bakirim pantun duo tigo, tak tasabuik lai pantunnyo,
Masaklah padi di Manggilang
Pucuak nan mintak digatahkan
Kok lai di dalam padi juo;
Adiak di dalam tangan urang
Inyo nan mintak disabakan
Kok lai di dalam hati juo.
Hiliakan Padang Silanggeni
Mudiak kampuang Silinjato
114
