Duobaleh, sarato manti jo dubalang, mairiangkan basa jo pangulu.
Dek lamo lambek bajalan, alah tibo di kampuang nantun, di laman rumah Subang Bagelang, alah naiak Rajo Duobaleh, sarato basa jo pangulu, duduak inyo di kasua manggalo, basanda di banta gadang.
Lamo sabanta antaronyo, alah tibo imam dangan khatib, tibo pulo Tuanku Kadhi, alek lah duduak tangah rumah, sadang dek angku Rajo Kuaso, alah ka sanang paratian, manarimo minantu urang kayo, lai kayo lai pulo rajo, salah saketek urang tuo, tidak sapadan dangan anak.
Tidaklah kaba dipapanjang, kaba baraliah tantang itu, baraliah ka si Magek, sadang dek Magek Manandin, inyo bamanuang dalam surau, dapek pikiran sakutiko, elok ambo ka kiun, ka rumah Subang Bagelang. Asa sabuik nak tarapuang, namun batu tanggalam juo, kalau ado suratan baiak, barang ka mano baiak juo, jikok hanyo suratan buruak, barang ka mano buruak juo, iyo nan bak buni pantun urang,
Si Amat Sutan Marajo
Urang Simabua di Parabek
Barumah di Kapeh Panji;
Ampek bulan dikanduang bundo
Buruak jo baiak lah tasurek
Kini nan utang mandapati.
Dari Mangguang ka Limo Koto
Sikalat labiah pangguntiangan;
Pado manangguang nan bak nangko
Bialah badan marasaikan.
Lamo sabanta antaronyo, sadang bapikia-pikia juo, bajalan malah Magek Manandin, ka rumah Subang Bagelang, dek lamo lambek di jalan, alah tibo di kampuang nantun, di laman rumah Subang Bagelang.
120
