Magek Manandin, lamo sabanta antaronyo, bakato Subang Bagelang, “Tuan kanduang Magek Manandin, Tuan pai malah mandi, buangkan malah baju buruak.”
Lamo sabanta antaronyo, alah mandi Magek Manandin, sudahnyo mandi babaliak pulang, alah duduak Magek Manandin, nasi talatak dek si Kambang, sudah makan sudah minum, sudah marokok makan siriah, bakato Magek Manandin, “Adiak kanduang Subang Bagelang, hari lah laruik tangah malam, ambo bajalan hanyo lai, rilahkan nasi nan tamakan.”
Manjawab Subang Bagelang, “Tuan kanduang Magek Manandin, namun malam samalam nangko, tidak suko ambo malapeh, barisuak kok siang hari, pai malah Tuan ka balai, nak ambo bari Tuan pitih, untuak palawan dunia urang, ambo bari ayam nan sikua, lawan manyabuang tunangan ambo, nan bagala Rajo Duobaleh.
Lawan bataruah banyak-banyak, kalau kalah Tuan dibayia, kok lai batolong pado Allah, usahlah kalah ayam kito, sabab lah lamo di pautan.”
Manjawab Magek Manandin, “Adiak kanduang Subang Bagelang, Adiak kanduang bapikia malah, adiak di dalam batunangan, sabagai pulo adiak kanduang, jikok di siko ambo bamalam, kalau tahu Rajo Duobaleh, manjadi musuah kamudian.”
Alah panek tangka batangka, manangih Subang Bagelang, “Tuan kanduang Magek Manandin, usah Tuan bajalan lai, laloklah Tuan ateh anjuang, ambo tidua di tangah rumah.”
Alah patuik jarami lapuak
Alah lamo batang tarandam;
Alah patuik mato takantuak
Hari lah laruik tangah malam.
130
