Adat di Galanggang
Lamo sabanta antaronyo, alah lalok Magek Manandin, inyo lalok di ateh anjuang, di dalam kulambu rumin.
Hari badarok siang juo, ayam bakukuak manjagokan, alah kiro kiro pukua anam pagi, alah mandi Magek Manandin, sudah mandi inyo sumbahyang, mamintak inyo pado Allah, lapehkan badan dari sansaro, datang pitunjuak dari Allah, alah barubah parangainyo, alah tahu manyambah tuhan, tidak namuah bajudi lai.
Hari kiro-kiro pukua sambilan, nasi lah masak dek si Kambang, bakato si Kambang Manih, “Tuan makan malah dahulu.”
Alah makan Magek Manandin, sudah makan sudah minum, bakato Subang Bagelang, “Tuan kanduang Magek Manandin, mamakai malah Tuan Kanduang, Tuan ka pai ka galanggang.’
Alah mamakai Magek Manandin, alah lakek kain jo baju, alah sudah inyo mamakai, sadang dek Subang Bagelang, diambiak urai limo kaco, dibarikan ayam nan sikua, sarato taji sabarumbuang, si Salamat mambao ayam, alah bajalan inyo baduo.
Dek lamo lambek bajalan, hampia ka tibo hanyo lai, alah tibo cando di galanggang, di galanggang Subang Bagelang, hiru biru urang nan banyak, maliek sutan baru datang, rancak nan bukan
132
