alang-alang, laranglah puti ka judunyo, bakato manti jolong pandai,
“Manolah Tuan baru datang, di mano bana kampuang Tuan, salamo galanggang rami, balun parnah kami maliek, urang nan sarancak sutan, bari luruih kami batanyo.
Kalau dipandang-pandang bana, sarupo saroman tidak, mato kami salah mamandang, hampia sarupo jo nan hilang, anak angku Datuak Bandaharo, kamanakan Rajo Kuaso, nan geneang di Sandiangbaka, banamo Magek Manandin.
Tatapi tidak kan mungkin, sabab inyo lah kami buang, dicampakkan ka dalam lurah, kini di mano inyo lai, antah lah lapuak jadi tanah.”
Manjawab Magek Manandin, “Jikok itu Tuan tanyokan, dusun nagari tidak tantu, banyak manangguang parasaian,
Ka ayia ka lubuak pulo
Ka pulang mambaok labu;
Lahianyo ambo di siko
Batinnyo dagang tidak tantu.”
Lamo sabanta antaronyo, alah datang Rajo Duobaleh, alah tibo inyo di balai, bakato Rajo Dubaleh, “Manolah Sutan baru datang, hari nangko lah rambang tinggi, kito manyabuang malah salapeh, jikok kalah pambuang maro, kalau manang pambali siriah.”
Manjawab Magek Manandin, “Kalau baitu kato Angku, nak kito padan malah ayam.”
Alah dibulang ayam biriang, ayam Angku Rajo Duobaleh, ayam gadang bataji gadang, banamo Biriang Sanggonani, sadang dek Magek Manandin, alah dibulang pulo ayam, ayam kuriak Gadih Gadanggo.
Alah sudah ayam dibulang, dilatakkan di ateh medan, sarato dangan taruah ayam, taruahnyo limo kaco urai. Sadang dek Angku Rajo Duobaleh, baru maliek taruah ayam, tamanuang Rajo Duobaleh,
134
