joa lah taruah ka dilawan, awak tanamo kato urang, tatapi ameh tidak sampai.
Mamanca paluah di kaniang, disemba pitih tangah balai, mamintak tolong ka anak buah, habih tajua sawah ladang.
Alah batampin taruah ayam, dibaok ayam kaduonyo, dilatakkan di tangah medan, bakato Rajo Duobaleh, “Manolah Sutan baru datang, di mano Sutan dapek ayam, sabab ambo batanyo bana, sarupo kaki jo bulunyo, sarupo ayam tunangan ambo, nan banamo Subang Bagelang.”
Manjawab Magek Manandin, “Jikok itu Angku tanyokan, pandang bana lah nyato-nyato, ayam kok banyak nan sarupo, kok lai di angku ayam kuriak, ayam kuriak Gadih Gadanggo, di ambo antah lai pulo, kok lai di Angku Subang Bagelang, di ambo antah lai pulo, sabab baitu kato ambo, ayam kok banyak nan sarupo, kukuak banyak nan saroman, kok urang banyak nan sanamo, iyolah dakwa bagalanggang, tatap-tatap mato dakwa.”
Tamanuang Rajo Duobaleh, hati samak-samak ragu, antah iyo antah moh tidak, balun dapek kato nan sahieh. Tidaklah kaba dipanjangkan, singkek sakadar ka pangguno, alah batampin taruah ayam, alah diadu malah ayam, sasudah ayam dilapeh, bakato Magek Manandin, “Ampun Tuanku Rajo di siko, sarato sanak jo saudaro, bari luruih ambo batanyo, apo pantangan di galanggang, sabab ambo baru ka balai, jan sampai tadorong-dorong sajo.”
Manjawab Rajo Duobaleh, didanga di urang tangah balai, “Jikok itu Sutan tanyokan, nan jadi pantangan di galanggang, mahariak mahantam tanah, jikalau kalah di ameh sajo, muluik nan usah dipabanyak, ayam nan buliah kito sabuang, namun adat dipakai juo, baso jo basi indak lupo, baitu adat di galanggang.”
Manjawab Magek Manandin, “Kalau baitu kato Angku, ambo simpan di dalam dado, samo manyarah pado Allah.”
