Alah manikam ayam kuriak, tibo di dado ayam biriang, alah patah ayam Sanggonani, alah bakukuak ayam kuriak, alah dapek cemo tangah balai, alah rusuah urang di nagari, siko lah kalah rajo kito.
Lamo sabanta antaronyo, alah mati Biriang Sanggonani, ayam Angku Rajo Duobaleh, bakato Magek Manandin, “Manolah Angku Rajo Duobaleh, kito cotokkan malah ayam, nak tantu kalah jo manangnyo.”
Manjawab Rajo Duobaleh, “Manolah Sutan baru datang, kok diambiak bana lah ayam, jikok Sutan nyato lah manang, ayam ambo nyato lah mati, tapi manang tidak manarimo, kalah pantang ambo mambayia. Tidak koh didanga baritonyo, kan ambo Rajo Duobaleh, mambunuah tidak mambangun, bautang pantang mambayia.
Sabagai lai den katokan, samaso hari dahulunyo, adolah urang nan barani, nana geneang di Sandiangbaka, urang tanamo sajak ketek, sampai marasai inyo di siko, kini lah mati dalam rimbo.
Tunangannyo den ambiak pulo, inyo banama Magek Manandin, mamak kayo bapak batuah, kini lah sansai jadi luluak. Kok sarupo Sutan nangko, ditambah bana agak saratuih, tidak ka dapek juo manang, utang nan tidak babayia, antah kok nyawo nan ka pai.”
Manjawab Magek Manandin, “Kalau baitu kato angku, manang kok tidak manarimo, utang kok tidak babayaran, bialah ambo tidak pulang, jikok baiyo iyo bana, sareceh indak ditinggakan, tapi sungguahpun baitu, kok sapanjang pikiran ambo, elok lah angku babaliak pulang, kok lai lamak buah jarami, lai takana anak kamanakan.
Jikok salorong badan ambo, salangkah turun di janjang, tidak baniat ka nan buruak, kalau takadia dari Allah, musuah tidak dicaricari, basuo pantang dihindakan.
Pipik jantan tidak basarang, Angku nan tidak bapikiran, lah nyato anak dagang sansai, kok elok ratak tangan ambo, banduanglah ratok dalam kampuang, manjadi abu kampuang nangko.
