Kok buruak suratan ambo, matilah badan ambo surang, kok mati jan dikubuakan, baok bapikia malah dahulu!”
Sadang dek Rajo Duobaleh, tidak diagak dipikiakan, awak nan bagak kato awak, makan kaki sajamba makan, mahariak mahantam tanah, dubalangpun mancabuik padang. Sadang dek Rajo Duobaleh, alah dipancuang Magek Manandin, tuhan Allah ado manolong, tidak namuah basi mamakan.
Hiru-biru tangah balai, basigap urang di nagari, urang bahimpun gadang ketek, datang surang mambaok batu, apo nan dapek dipukuakan. Sadang dek Magek Manandin, hati nan tidak rusuah bana, baribu-ribu nak nyo datang, manyarah sajo pado Allah, tidak aja bapantang mati, alah takana di nan bana.
Bakato Magek Manandin, kapado Dubalang nan barampek, sarato urang tangah balai, “Manolah niniak mamak ambo, aluran adiak dangan kakak, ambo surang lawan baribu, tidak ibo di anak dagang, tapi sungguahpun baitu, bapikia malah tuan-tuan, jikok salorong badan ambo, kalau ka pulang pulang sajo, tidak malawan dunia urang, pado hiduik baiaklah mati.”
Urang banyak tidak manjawab, urang rintang mamukua juo, bakato pulo Magek Manandin, “Mano angku Rajo Duobaleh, tidak tatangguang parasaian, raso kan putuih nyawo di badan, ambo mambaleh hanyo lai!”
Alah mambaleh Magek Manandin, mato sirah sarupo saga, sarupo harimau ka manangkok, dibuang langkah nan kanan, diganjua suruik bak batanam, mamintak ampun pado Allah, tabunuah juo rajo nangko.
Pintak nan sadang ka balaku, ditikam Rajo Duobaleh, tibo di ulak-ulak dado, darah lah manyambua-nyambua, diambiak pinggang dilacuikkan, sadang dek Rajo Duobaleh, tidak tahu di diri lai, alah mati Rajo Duobaleh.
