Kini baitu malah dek bapak, mari kito basamo pai, ka ranah ka Sandiangbaka, elok kan sajo hati bapak, kito manyarah pado Allah, nan kareh kok untuang lunak.”
Lamo sabanta antaronyo, alah bajalan Subang Bagelang, sarato Puti Andam Dewi, basamo angku Rajo Kuaso, si Kambang banyak mairiangkan.
Dek lamo lambek bajalan, alah tibo di Sandiangbaka, alah naiak Rajo Kuaso, sarato Puti Andam Dewi, batigo jo Subang Bagelang, alah duduak di tangah rumah.
Lamo sabanta inyo duduak, talatak siriah dek si Kambang, alah datang Datuak Bandaharo, sarato Puti Linduang Bulan, tibo pulo Magek Manandin, jauah-jauah maangkek sambah, alah hampia manyusun jari, dijawek salam pado mamak, bakato Magek Manandin, “Manolah mamak ambo Rajo Kuaso, bari maaf ambo di mamak, salah ambo lah banyak bana, sahinggo iko ka ateh, ambo ubah parangai ambo, indak ambo bajudi lai.”
Baru mandanga kato nantun, manangih Rajo Kuaso, takana gadang kasalahan, itu ruponyo kamanakan, takuik nan bukan alangalang, lah nyato bana awak salah, inyo juo nan mintak ampun, sadang dek angku Rajo Kuaso, sabuah tidak manjawab, batambah takuik dalam hati.
Lamo sabanta antaronyo, bakato Rajo Kuaso, “Adiak kanduang Datuak Bandaharo, duo jo Puti Linduang Bulan, salah ambo alah banyak bana, kok buliah bali dangan pintak, kini nan buruak kito buang, nan elok sajo kito pakai, siriah nak suruik ka gagangnyo.
Sabab baitu kato ambo, si buyuang Magek Manandin, dangan Puti Subang Bagelang, alah batunangan sajak ketek, banyak sansaro nan dirasokannyo, dek untuang batamu juo, tidak dapek dilarai urang, sahinggo itu pintak ambo, si bungsu alah gadang pulo, basamo kito mausahokan.”
152
