Manjawab Datuak Bandaharo, sarato Puti Linduang Bulan, “Ampun kami tuan kanduang, kalau baitu kato Tuan, kami nan tidak manyalahi, apo parentah kami turuik, tatapi samantangpun baitu, mamintak kapado Tuan, si Buyuang Magek Manandin, jo si Upiak Subang Bagelang, mintak janji kami sabulan, kok sampai janji sabulan, kito kawinkan hanyo lai, sabab baitu kato kami, pakakeh banyak nan kurang, balun ado ambo basadio.
Kok salorong Magek Manandin, sarato jo si upiak Puti Bungsu, inyo iyo alah gadang, tapi gadang di badan sajo baru, balun nyo tahu di adat jo pusako, balun nyo tahu di ereng jo gendeng.”
Manjawab Rajo Kuaso, “Kalau baitu kato adiak, iyo pulo itu kironyo, mananti malah ambo sabulan lamonyo.”
Alah sudah nan bak nantun, alah sanang hati Rajo Kuaso, duo jo Puti Andam Dewi, lah mamintak izin nak babaliak, pulang babaliak ka rumah.
Sadang dek Datuak Bandaharo, duo jo Puti Linduang Bulan, dihimbau anak kaduonyo, handak ditunjuak diajari.
“Manolah anak kanduang ambo, nan gadang Magek Manandin, nan ketek Puti Bungsu, anak kamari malah duduak, ado sabuah denai katokan, dangakan di anak sungguah-sungguah.
Salorong tantang kalian kaduonyo, kok gadang iyo lah gadang, tapi balun tahu di adat jo pusako, kok nyampang si Buyuang Magek Manandin, jadi kawin jo Puti Subang Bagelang, elok-elok anak di parangai, bapikia anak dahulu, apo-apo karajo nan ka dibuek, jan manyasa kamudian, sasa kudian tidak baguno.
Kok nyampang anak alah kawin, jadi rang sumando di rumah urang, usah disangko murah sajo, sangaik sarik tu anak kanduang, kok tumbuah malang jo mujua, baok bamuah jo mamak rumah, sarato mintuo kaduonyo, usah dilangkahi tu nak kanduang, sabab di dunia nangko, elok buruak tidak bacarai.
154
