Kok nyampang tumbuah bantah jo kalahi, dangan anak sandari, jan anak bahati gadang sajo, samantang anak geneang dalam kampuang, samantang anak rang jamputan bana, usah anak manggadang sajo, buruak akhia kelaknyo tu nak kanduang.”
Taadok anak kanduang Puti Bungsu, bakato pulo mandehnyo, “Anak kanduang Puti Bungsu, dangakan dek anak jaleh-jaleh, salorong anak ka basuami, banyak pantangan pado parampuan, kok nyampang suami tidak pulang, jan anak bamuko masam, jan anak tabik rabo sajo, namun nasi jo minuman hidangkan juo.
Kok anak ka batanyo juo, nantikan suami sudah makan, liek pulo kutiko nan elok, barulah anak manyudi jo siasek. Kok tumbuah bantah jo kalahi, jan mamburansang sajo, lalu sampai anak malawan, sampai mamintak kato carai, diasuang setan jo ibilih, kok tidak anak lakeh tobat, kok mati di dalam itu, mauruik kato nabi kito, tidak dapek baun sarugo, ka narako juo nan kakal.
Sabagai pulo kato mandeh, kalau laki sadang bansaik, banyakkan ibo ka badannyo, usah harok di kayo urang, kasiah kok tasabab dek ameh perak, akhia kelaknyo kamudian, pitih habih badan bacarai, tidak kakal guno dikarang, tando badan ka banyak laki, satu anak satu bapaknyo. Apo sabab mako baitu, kok kareh sangaik dayo setan, ulah nak lakeh kayo juo, disangko dapek dangan kuaik, utang dek kito bausaho.
Sabagai pulo oi nak kanduang, nan jadi tuah parampuan, cilako di laki-laki, maninggikan diri salalu kapado suami, kapado Allah sangaik takuik, sababnyo mangko dek baitu, kalau parampuan marandahkan diri mangatokan awak urang miskin, atau balaki tidak ado, sawah ladang jauah sakali, di sanan lalu akal nan jahek, sabab dipatuik haragonyo, akhia kelaknyo kamudian, sampai mambuek nan tak patuik, nan dilarang dek adaik jo agamo.
156
