Alah sapakan galanggang rami, ramilah rabab jo kucapi, pupuik saluang tidak dietong, bakumpua anak mudo-mudo.
Padi alah babumbun-bumbun
Pinang masak batandan-tandan;
Anak gadih baduyun-duyun
Nan bujang lah batolan-tolan.
Lah lamo galanggang rami, alah banyak kabau nan habih, habih bareh bapikua-pikua, balun dapek nan ka judu, iyolah judu Puti Linduang Bulan.
Balam timbago tigo gayo
Murai babuni ateh pintu;
Salam takzim badan ambo
Kaba baraliah tantang itu.
Sungguah baraliah sanan juo, aliahnyo kapado Datuak Bandaharo. Itulah urang nan tasabuik, nan geneang di kampuang Situmangkuto, di ranah kampuang Sumani, muluik manih kucindan murah, tahu di adat dangan syarak, urang kampuang suko samuonyo.
Sadang dek Datuak Bandaharo, sadang duduak di surambi, alah tasirok darah di dado, hati nan tidak sanang lai, lah hilang pangana sakutiko, tidak batantu dirusuahkan, hati nan sadang bauweh-uweh juo.
Tampaknyo si Bujang Salamat di laman, mambaok surek nan sapucuak, sanan bakato si Salamat, “Manolah Datuak janyo ambo, ikolah surek nan sapucuak, dari Tuanku Rajo Kuaso, dari ranah Kampuang Dalam.”
Surek ditarimo dek Datuak Bandaharo, lalu dibaco malah surek, dari awa sampai akhia, surek panggilan ka galanggang, alah rapek Basa jo Pangulu, sarato anak Rajo-rajo.
Sadang dek Datuak Bandaharo, alah sudah surek dibaconyo, dipikia-pikia dimanuangkan, alah taraso dalam hati, mukasuik nak pai baralek.
