dado dikaluahkan, mahambua jiko tak sampai, pikiri bana tu nak kanduang, pitaruah jan diubahi, pabanyak adat ka suami, takuik lah anak lahia batin, usah pangana kiri kanan, walau kamano ka dituruik, paralu izinnyo anak mintak.
Kalau laki pulang bajalan, walau inyo ado di rumah, paliekkan inyo muko nan janiah, manuruik kato nabi kito, sarugo parampuan di bawah tapak laki-laki, takuiklah anak lahia batin, agamo jan ditinggakan, sahinggo itu malah dahulu.”
Bakato Datuak Bandaharo, kapado Puti Linduang Bulan, “Adiak kanduang Puti Linduang Bulan, sabuah ambo katokan, kok sampai kito baminantu, nan jantan kok nyo babini, tasabuik adat baminantu, kalau buliah bali jo pintak, bia tasabuik uang jo pitih, tidak buliah kito campuri.
Jikok salah tampak minantu, bari sajo malah nasihat, bakato dangan manih muluik, usah sarupo basambayanan, dahulu maso manarimo, bukan basuluah batang, buruak baiak kito lah tahu, kayo jo bansaik lah kito pandang, kok suko jo anak kito, bia hino dangan mulia, usah manjadi kato-kato, jan campua kito di sanan, jikok campua kito di sanan, tasabuik buruak dangan baiak, buruak tadanga tabarito.
Padang Sarai jalan ka Bonjo
Jalan pidati patang pagi;
Bacarai sabab dek mintuo
Itu manyusah dalam hati.
Jauahi bana tu Adiak kanduang, jan manyasa kamudian, kok banyak urang kampuang tahu, basukek jilatang api, kito manjadi mintuo urang, jan jadi cacek saumua hiduik.”
Sadang dek Datuak Bandaharo, dihimbau pulo anak kanduag, nan banamo Magek Manandin, “Oi buyuang Magek Manandin, anak ka mari malah duduak.”
160
