Alah datang Magek Manandin, duduak di hampia bapak kanduang, bakato Datuak Bandaharo, “Anak kanduang Magek Manandin, pacik pituah elok-elok, buhua di dalam kabek pinggang, jan lupo saumua hiduik, tandonyo kito urang mudo, mudo nan ampek parkaro.
Partamo mudo pusako, kaduo banamo mudo adat, katigo mudo limbago, kaampek mudo manarawang, nak Bapak tarangkan ciek-ciek.
Nan banamo ‘mudo pusako’, manyahuak di hilia-hilia, bakato di bawah-bawah, aluran mamak di pamamak, aluran bapak di pabapak juo, galak nan usah dipabanyak, satia takuik salalu, tidak ado maninggikan diri, kok kayo tidak dikayokan, hino mulia baitu pulo, bangso nan tidak dipanggakkan, hino diri takana juo, baitu tando urang baadat, itu banamo mudo pusako.
Dinamokan ‘mudo adat’, saroman hampia sarupo, bakato di bawah-bawah, muluik manih kucindan murah, kok batamu korong jo kampuang, aluran adiak dangan kakak, walau urang sanagari, sarato dunsanak jo saudaro, hino dangan mulia, paralu inyo disapo, dari mano handak ka mano, tuo tatap dimuliakan, lorong nan mudo dikasiahi.
Apo karajo dalam kampuang, tidak ado dipatahinyo, walaupun saluang dangan pupuik, sarato rabab jo kucapi, suko tak suko anak pado itu, di lahia sajo manihkan rupo, di batin buliah ditukari, sado nan buruak nan baiak ka tangahkan juo.
Nan banamo ‘mudo limbago’, kok sasek namuah diganjua suruik ka nan bana, namuah ditunjuak diajari, tidak manupang pado kabaikan.
Nan banamo ‘mudo manarawang’, bapaham tidak nan tapek, ka sanan elok ka mari baiak, bak pimpiang di tapi tabiang, ka mano angin nan kareh, ka sanan pulo condongnyo, tidak mangana akhia kelaknyo, takana malompek sajo.
162
