Kalau mancaliak bungo kambang, mato nan usah dipalia, bia hati sangaik kasiah, di muko tidak kalihatan.
Usah anak mancinto ka nan buruak, badan kok jadi cacek dek urang, apo gunonyo rancak awak, kalau nan jadi upek pado urang kampuang.
Jikok nan merah iyolah sago
Jikok nan kuriak iyolah kundi;
Jikok nan indah iyolah baso
Jikok nan baiak iyolah budi.
Jikok pandai anak batenggang, pado nan elok atau nan buruak, tak ubahnyo bak pangajaran nan tuo-tuo,
Satali pambali kumayan
Sakupang pambali katayo;
Sakali lancuang ka ujian
Saumua hiduik urang tak picayo.
Taadok anak kanduang Puti Bungsu, dangakan bana elok-elok, jan maupek kamudian. Adopun parampuan tabagi tigo, partamo parampuan sabana parampuan, kaduo parampuan si marawan, katigo parampuan rimbang taliawan.
Adopun ‘parampuan sabana parampuan’, cukuik tapakai sagalo taratik, tahu di sopan dangan santun, bia di dalam atau di lua rumah tanggo.
Adopun ‘parampuan si marawan’, pahamnyo sarupo gatah cayia, iko elok itu katuju, rintang barambang mato sajo, kian kasiah kamari kasiah, mudah sajo mambari hati, sarato manyarahkan diri.
Dikatokan juo ‘parampuan rimbang taliawan’, itu parampuan tinggi hati, salalu mamuji suaminyo, mamanggakkan lakinyo sajo, nan bahati gadang sajo, nan lain urang tidak nan sabaruntuang inyo.
Timbang dek anak elok-elok, usah tadorong lalu sajo, manyasa kudian tak baguno.”
164
