Alah tibo cando di galanggang, siriah talatak dek Si Kambang, bakato Puti Linduang Bulan, “Oi tuan Datuak Bandaharo, mari kito naiak ka rumah, nasi tahedang alah dingin, bungo dikarang alah layua, Tuan nan tidak datang juo, iyo bana bak pantun urang:
Alah panek ambo dek babansi
Rabab tasanda di pamatang;
Alah panek ambo dek manati
Tuan nan tidak kunjuang datang.
Kini baitu lah dek Tuan, tidak guno lamo di siko, kito naiak malah ka rumah, urang lah rapek manantikan, sarato Imam dangan Khatib.”
Tidak lamo antaronyo, alah bajalan Datuak Bandaharo, duo jo Puti Linduang Bulan, alah naiak ka rumah gadang, alah diduduakkan Datuak Bandaharo, sarato jo Puti Linduang Bulan, di ateh kasua nan gadang.
Alah sudah mamakan siriah, diambiak tampek parasapan, dibaka kumayan putiah, asok mandulang ka udaro, alah manyambah Rajo Kuaso, kapado Basa jo Pangulu, sarato Imam dangan Khatib, niat jo kaua nak nyo lapeh.
“Adiak ambo Puti Linduang Bulan, duo jo Datuak Bandaharo, mamintak ambo basungguah-sungguah, kapado Imam dangan Khatib, sarato Basa jo Pangulu, Angku kawinkan kini nangko, tolong bacokan doa salamaik, kok lai untuang bakakalan, jan ado cacek maro malintang.”
Sadang dek Imam dangan Khatib, alah dibaco khotbah nikah, ijab jatuah kabul dijawek, alah kawin Datuak Bandaharo, dangan Puti Linduang Bulan, di muko saksi nan barampek, alah dibaco doa salamaik.
Lamo sabanta antaronyo, urang banyak mamintak pulang, baitu juo Imam dangan Khatib, sarato Basa jo Pangulu, “Kudian kok
