Hari baganti pakan, pakan baganti bulan, sadang dek Datuak Bandaharo, duo jo Puti Linduang Bulan, alah dapek hari nan elok, Tuhan Allah sadang ka mambari, alah tibo pambarian Allah, alah hamil Si Linduang Bulan, alah sabulan duo bulan, anam bulan ka lamonyo.
Lah gadang hati Datuak Bandaharo, bakato Puti Linduang Bulan, “Oi tuan Datuak Bandaharo, salamo ambo dalam bababan, balun parnah ambo bakandak, kini lah baru nan tacinto, tolong carikan ambo di Tuan, ikan rayo baradai ameh, itu pangidaman ambo kini-kini.”
Sadang dek Datuak Bandaharo, baru mandanga kato nantun, alah dihimpun anak buah, disuruah carikan ikan nantun, tigo hari lamo mancari, barulah dapek ikan nantun, dibaok dubalang nan barampek, disambahkan kapado Datuak Bandaharo.
Sadang dek Datuak Bandaharo, alah diambiaknyo ikan nantun, dibarikan kapado Si Kambang, ikan digulai dek Si Kambang. Lamo sabanta antaronyo, lah masak malah gulai ikan, sananglah hati Linduang Bulan, diam di ateh anjuang tinggi, kipeh basabuang kiri kanan.
