Tujuah bulan di dalam bababan barek, bakato Puti Linduang Bulan, “Tuan kanduang Datuak Bandaharo, pacik dek Tuan pitaruah denai, kok tumbuah lahia anak kito laki-laki, bari namo Magek Manandin, kok lahia anak kito parampuan, bari namo Puti Bungsu.”
Manjawab Datuak Bandaharo, “Adiak kanduang Puti Linduang Bulan, usah adiak tagamang tantang itu, ambo pacik pitaruah arek-arek, tidak manupang badan ambo, kok umua samo panjang, mamintak juo kapado Allah, usah cacek maro malintang, salamaik sajo badan adiak.”
Pintak nan sadang ka balaku, alah sampai bilangan bulan, lah datang hari kutikonyo, patang Ahad malam Sinayan, sadangnyo laruik tangah malam, kiro-kiro pukua duo baleh, alah sakik Puti Linduang Bulan, sakik bak raso ka baranak.
Alah dihimbau malah dukun, dukun tibo bidan lah datang, alah duduak tangah rumah. Lamo sabanta antaronyo, iyo alah layia anak kanduang, dicaliak anak laki-laki, dukun basiap hanyo lai, disalamaikkan malah anak kanduang.
Sadang dek Puti Linduang Bulan, alah tahu inyo di badannyo, hari hampia badarok siang, duo kali ayam bakukuak, murai bakicau hari siang, di hari nan sahari nantun, diliek anak laki-laki, lah dinamokan Magek Manandin.
Hari lah baganti hari, alah datang pulo Rajo Kuaso, Allahu Rabbi suko hati, mancaliak adiak lah baranak, surang anak laki-laki.
Sanan bakato Rajo Kuaso, “Adiak kanduang Linduang Bulan, duo jo Datuak Bandaharo, kaba baiak ambo sampaikan, alah patuik kito patunangkan, sabab baitu kato ambo, anak ambo lah lahia pulo, tigo hari baru di dunia, adolah anak parampuan, banamo Subang Bagelang, mandehnyo Puti Andam Dewi.
Kini baitu dek adiak, Si Buyuang Magek Manandin, duo jo Puti Subang Bagelang, kito patunangkan kain pandukuang, supayo
