Alah sahari duo hari, habih pakan baganti bulan, sambilan bulan ka lamonyo, pado suatu hari kutikonyo, alah lahia malah anak kanduang, alah sanang raso paratian, adolah anak parampuan, sahari ado sahari banamo, dinamokan Puti Nan Bungsu, alah buliah lawan baiyo, Allahu Rabbi gadang hati.
Alah sabulan lamo di dunia, gadang bak diambuang-ambuang, bak nyiru di tapi lasuang, mandi baturab ayia bungo, kipeh basabuang kiri kanan, Si Kambang banyak manjagoi.
Tidaklah kaba dipapanjang, dek lamo bakalamoan, anak lah gadang kaduonyo, salah saketek pado bapak, anak nan tidak disarahkan, pai pangaji tidak pulo, baso-basi jauah sakali, hanyo nan labiah sabuang jo judi, manuruik kandak hati sajo, maklumlah tuan anak bujang, di mano sorak nan rami, alah di sanan Magek Manandin, nan suko bana inyo manyabuang
Badan batambah gadang juo, urang barajo di hatinyo, manuruik hati gadang sajo, nan labiah ambuang sipak rago, tidak takana paruik lapa, tidak tantu hino jo mulia, alah baumua duo baleh tahun.
Ramilah balai pasa Gadang
Raminyo sadang tangah hari;
Bari maaf ambo mangarang
Kaba baraliah hanyo lai.
