Sungguah baraliah sanan juo, aliahnyo kapado Rajo Duobaleh,
urang ranah Kampuang Singkarak, itulah Rajo tidak adia, baadiak
surang parampuan, banamo Puti Nilam Cahayo, dicaliak adiak lah
gadang, alah patuik pulo basuami, dipanggia malah Dubalang.
Datang dubalang nan barampek, bakato Rajo Duobaleh, “Manolah Manti jo Dubalang, lacuik malah tabuah larangan.”
Dek Dubalang nan barampek, lah diambiak rotan palacuik, lalu dilacuik tabuah larangan, bahimpun urang gadang ketek, nan di bukik datang manurun, nan di lurah datang mandaki.
Bakato manti jo dubalang, “Ampun Tuanku rajo kami, kalau dijua kami jauah, Tuanku juo karugian, kato bana disambahkan juo, apo sabab tabuah babuni, di mano dubalang rabuik rampeh, di mano pangulu salah hukum.”
Sanan manjawab Rajo Duobaleh, “Manolah Manti jo Dubalang, sabab ambo panggia bana, bukan Dubalang rabuik rampeh, tidak Pangulu salah hukum, hanyo sabuah nan takana, niat jo kaua disampaikan, adiak ambo iyolah gadang, banamo Puti Nilam Cahayo, alah patuik pulo basuami, kito pancang malah galanggang, kito baralek hanyo lai.”
